லவாயோ நகரில் நடந்து வரும் ஜிம்பாப்வே அணிக்கு எதிரான ஒருநாள் போட்டியில் பாகிஸ்தான் வீரர் பக்கர் ஜமான் 210 ரன்கள் அடித்து சாதனை படைத்துள்ளார்.

தொடக்க ஆட்டக்காரர்கள் பக்கர் ஜமன், இமான் உல் ஹக் இருவரும் முதல் விக்கெட்டுக்கு 304 ரன்கள் சேர்த்துப் பிரிந்தனர். ஒருநாள் கிரிக்கெட் வரலாற்றில் தொடக்க ஆட்டக்காரர்கள் யாரும் செய்யாத சாதனையாகும்.

50 ஓவர்கள் முடிவில் பாகிஸ்தான் அணி ஒரு விக்கெட் இழப்புக்கு 399 ரன்கள் சேர்த்தது. இதையடுத்து, ஜிம்பாப்வே அணி வெற்றி பெற 400 ரன்கள் இலக்கு நிர்ணயித்துள்ளது பாகிஸ்தான் அணி.

முதல் விக்கெட்டுக்கு பக்கர் ஜமன், உல் ஹக் இருவரும் 304 ரன்கள் சேர்த்து ஒருநாள் கிரிக்கெட் போட்டியில் உலக சாதனை படைத்தனர். இதுவரை முதல் விக்கெட்டுக்கு இலங்கை வீரர் ஜெயசூர்யா, தரங்கா ஆகியோர் 2006-ம் ஆண்டு இங்கிலாந்துக்கு எதிராக லீட்ஸ் மைதானத்தில் 286 ரன்கள் சேர்த்தே இதுவரை சாதனையாக இருந்தது. அந்த சாதனையை பக்கர் ஜமன், இமாம் உல் ஹக் முறியடித்தனர்.

சர்வதேச ஒருநாள் போட்டியில் பாகிஸ்தான் அணி சேர்த்த அதிகபட்ச ஸ்கோர் இதுவாகும். மேலும், எந்த ஒருபாகிஸ்தான் வீரரும் இரட்டை சதம் இதுவரை அடிக்கவில்லை. பாகிஸ்தான் வீரர் சயித் அன்வர் கடந்த 1997-ம் ஆண்டு இந்தியாவுக்கு எதிராக 194 ரன்கள் சேர்த்ததே அதிகபட்சமாக இருந்தது. அதை முறியடித்த பக்கர் ஜமன் முதல்முறையாக இரட்டை சதம் அடித்துள்ளார்.

அதுமட்டுமல்லாமல், 17 போட்டிகளில் விளையாடியுள்ள பக்கர் ஜமான் 980 ரன்கள் சேர்த்துள்ளார். ஆயிரம் ரன்களை எட்ட இன்னும் 20 ரன்கள் மட்டுமே தேவைப்படுகிறது. அதை அடுத்த போட்டியில் எட்டிவிட்டால், உலகில் அதிகவேகமாக, குறைந்த போட்டிகளில் ஆயிரம் ரன்களை எட்டிய முதல் வீரர் எனும் பெருமையைப் பக்கர் ஜமன் பெறுவார்.

LEAVE A REPLY

Please enter your comment!
Please enter your name here